Pernikahan

Pepeling Laki Rabi

Hirup laki-rabi pinuh ku rupa-rupa cocoba,seuri pacampur nyeri,aya
bungah aya susah, lir ibarat lalayaran di sagara.
Tatan-tatan ti anggalna, sangkan tabah tur tawekal
Kedah teguh pengkuh anceg panceg ka Gusti Rabbul Ijati.
sing runtut laut rempung jukung sauyunan, sareundeuk saigel, sabobot sapihanean.
Taat ngalaksana agama, ibadah ulah campoleh da urang teh bakal paeh,
Ka caroge kedah sae, pacuan ulah beungeut nyanghareup ati mungkir,
ka sasama ka ibu rama kedah handap asor sae budi basa.

Dina ngatur rumah tangga kedah tiasa
ngeureut miceun pinter neundeun miraweuy
sampeureun paikahareupeun, saeutik sing mahi loba sing nyesa.
Ulah mikahayang nu bakal moal laksana, kudu ngukur ka kujur nimbang ka awak

Dipangumbaraan, sing tiasa titip diri sangsang
badan pindah cai pindah tampian. Kudu jujur
laku hade lampah sangkan mulus bungkus
rahayu salamet jatmika taya codeka.

Hirup di dunya saukur ngumbara.
Umur katungkul ku pati maot teu nyaho dimangsa,
mun geus cunduk kana waktu dipundut kunu kagungan ,
harta sareng pangkat teu dicandak ka aherat,
saukur dibaju hasiwung diharudum boeh
ngaringkuk dijero kubur, katutup ku padung diurungan taneuh beureum,
Banda meunang sarakah , pangkat ladang ngajilat, teu jadi tatalang raga,
gedong sigrong moal digandong, pamajikan geulis moal di ais
salin rupi jadi liang poek mongkleng,

Pamungkas ieu piwuruk :
Ulah rek munjung ka gunung, muja ka talaga,
gunung mah sok rajeun urug, talaga sok rajeun bedah.
Munjung jeung muja ukur ka Gusti nu Maha Agung.

Ulah dibarengan munjung ka kayu ka batu, muja ka barhala laku kaliru
matak cilaka.
Sadaya amal ibadah bakal leungit taya leuwih, ngilang tampa kirana
Balukarna disiksa dina naraka taya kendatna.
Habluminalloh habluminanas
Powered by Telkomsel BlackBerry®