Potensi Urang Sunda

Urang Sunda mibanda seeur potensi, dina sagala widang.

Salah sawiosna, widang barakatak atawa bodor. Urang sunda mah teu bisa leupas tina heureuy, sabab eta teh geus jadi sakulit sadaging. Lain urang Sunda mun teu bisa heureuy. Di mana wae, dina kasempetan kumaha wae, pasti aya heureuyna. Jigana, karuhun urang baheula teh tukang ngabodor jiga kabayan.

Saderek
Urang Sunda, leupas tina sagala kahengkeranana, tetep mibanda potensi anu teu bisa dilalaworakeun. Urang sunda bisa kitu teh salah sahijina ku sabab teu era ngasongkeun konsep anu nyoko dina ajeg-ajeg kasundaan. Idiom idiom ekspresi kasundaan nu dikahareupkeun ku maranehanana tetela geus jadi ciri nu mandiri, tur dipikaresep lain ku urang Sunda wungkul.

Urang Sunda bisa nembongkeun 'sihung' dina sagala widang. Nu penting kudu aya kasadaran ti urang salaku urang Sunda, kudu rajin, amanah, cageur, pinter, bageur jeung ulah nepi ka era nembongkeun jatidiri kasundaan.

Tong era ngaku urang Sunda
Tong era nyarita ku basa Sunda, tong era nembongkeun yen urang mibanda jatidiri kasundaan. Mun urang boga budak, ajak nyarita ku basa Sunda, wawuhkeun kana budaya Sunda. Ulah ngarasa reueus mun anak urang palahak-polohok teu ngarti basana sorangan. Saha deui nu bisa nyalamatkeun sarta ngalastarikeun budaya jeung basa sunda, lamun lain budak urang (barudak ngora)

Salamatkeun Basa Sunda.

Kudu hariwang mun anak urang kerung ngadenge kacapi suling. Komo mun teu bisa basa sunda.
Atik maranehanana sangkan ngimpi ge mun bisa mah ku basa Sunda, sajabi ku basa Indonesia jeung Inggris.


Saderek, urang ulah ngan ukur nyalahkeun pangaruh budaya deungeun nu mahabu bari jeung euweuh tarekah ti sakabeh urang sunda pikeun ngadadasaran kulawarga sangkan panceg dina ajeg-ajeg kasundaan. Mun kabeh urang Sunda boga niat ngamumule budaya Sunda tur ngamimitian jeung prakna di lingkungan kulawargana, urang Sunda teh moal pareumeun obor.

InsyaAllah.